Myndlistarsýning til heiðurs Billu

Föstudaginn, 10. nóvember var haldin myndlistarsýning í Deiglunni og Mjólkurbúðinni á Akureyri.

Sýningin var einstök en verkin sem voru til sýnis eru öll verk áhugahóps myndlistarfólks sem allt á það sameiginlegt að hafa sótt námskeiðið „Fræðsla í formi og lit“  hjá myndlistarkonunni Bryndísi Arnardóttur sem lést fyrir aldur fram árið 2022.

Myndlistarhópurinn Gellur sem mála í bílskúr varð einmitt til í framhaldi af einu námskeiðanna hjá Billu og kom sú hugmynd upp hjá hópnum að setja upp myndlistarsýningu í minningu hennar og fá einnig til liðs fleiri nemendur Billu. Alls voru rúmlega 30 manns með myndir á sýningunni.

Billa var menntaður myndlistarmaður og með meistaragráðu í kennslufræðum listgreina. Hún stofnaði m.a. Listfræðsluna, myndlistarskóla fyrir almenning og var frumkvöðull í að fá viðurkenningu á einingarbæru myndlistarnámi með námskeiðinu. 

Listrænn stjórnandi sýningarinnar var Guðmundur Ármann myndlistarmaður en Billa og Guðmundur Ármann voru samstarfsfélagar og vinir og áttu m.a. stóran þátt í að byggja upp öfluga myndlistardeild við Verkmenntaskólann á Akureyri auk þess sem mikill fjöldi áhugafólks um myndlist hefur sótt hjá þeim námskeið í gegnum tíðina.

Sýningin stóð yfir dagana 10. – 12. nóvember. Norðurorka og KEA studdu við uppsetningu sýningarinnar.

Hér má sjá frétt frá heimsókn Forseta Íslands https://www.forseti.is/gellursemmala

Aðstandendur Billu hafa stofnað Minningarsjóð Bryndísar Arnardóttur og rann helmingur söluandvirðis myndanna á sýningunni í hann. Helmingur söluandvirðis myndanna á þessari síðu munu einnig renna í sjóðinn.  

Fjármunum sjóðsins skal varið til að styrkja konur á sviði sjónlista.

Með því að fara á síðuna Listaverk má sjá og kaupa verk af sýningunni